اليوم العشرون

لا مباريات اليوم، لا فوفوزيلا ولا "الحكم ابن شرموطة". ولا إشي. لا أعصاب ولا صوت مبحوح عشان لعبة البرازيل ولا دخان الناس بالإستراحة بين الشوطين. ولا إشي. رواق. اليوم ولا إشي.. لا مباريات اليوم.

*ملاحظة: اليوم بقدّر أقول لك "بحبّك".

اليوم الثامن والتاسع عشر

1. أسرانا في سجون الإحتلال... اسبانيا البرتغال واحد صفر... طمنونا عنكم!

2. البرازيل.. عنجد ترخّينا لتشيلي.. بضلوا من أميركا اللاتينية بدناش نشد عليهن.. :)

3.مونديال 2022 في قطر تحت عنوان "أجتك الفوفوزيلا يا تارك الصلاة"... تبدأ المباريات بعد صلاة الظهر.

4.يمكنهم أن يغيّروا شكل كرة المونديال ألف مرة ومرة... ستبقى الكرة البيضاء المرقطة بالمخمسات السوداء، هي "مثال" الكرة في ذهن كل إنسان.. وتسري في دماء كل أحرار العالم... إلى أبد الآبدين... آمين

5. أفكر أحيانًا أن كل حارس مرمى في العالم، كان طفلًا منبوذا يكرهه زملاءه في المدرسة، ويرفضون أن يلعب معهم كرة القدم، وحين يرغمهم معلم الرياضة السمين، يختارونه دائما ليقف حارس مرمى، فلا يشاركهم اللعب، ويشتمونه جميعهم حين "يُخلع" فيه هدف... وفقط في الضربات الترجيحية الحاسمة، فقط في الـ"دراما الكبرى" يُصبح هو محط الأنظار. في هذه الركلات الترجيحية تُقلب اللعبة، يصبح هذا المدافع بطلًا، وما ينتظره الجميع هو ليس الهدف بل عدم تسجيل الهدف... يصبح حارس المرمى بكفة وباقي اللاعبين كلهم في كفة أخرى، إنها اللحظة التي ينتقم فيها من الجميع، لو كان شيعيًا لقال: "يوم انتصار المظلوم على الظالم، وهيهات منا الذلة."

اليوم السابع عشر

1. الرفيق وئام بلعوم ضرب ضربته.. وإليكم الوصلة:
http://www.facebook.com/home.php?sk=lf#!/notes/weaam-baloum/mdhkrat-mshjt-mwndyal-mrhlt-byt-albywt/128073270562368

2. مجبور أحكي على موضوع انو الصبايا.. والصبايا بعرفوش.. والصبايا بوجعوا الراس بالمونديال وهيك... تعالوا نكون شوي صريحين.. الصبايا، فعلًا، بعرفوش كثير اشياء بالفطبول ومش مفروض فيهن، مش مفروض تهمهن إهتماماتنا، هاي أولًا، وبما انه مش مجبورة تهمهن إهتماماتنا، فمش مجبورين يتحملونا، ومش مجبورين يوكلوا هوا شهر كامل. فمع إنهن بعصبنوا مرّات، بس قولوا شكرًا انهن قرروا يهتموا بالمونديال.. ومقلولكوش "خرا عليك بدي أحضر ناشينال جيوغرافيك". انو عن جد .. قولوا شكرًا. هاي أولًا..
ثانيًا، مين قال انو كل الشباب بتعرف فطبول احسن من الصبايا؟ محضرتك وحضرته قبل المونديال بشهر كل يوم بتشتروا الجريدة عشان تقرأوا الملحق الرياضي، صفحة البيت بتصير http://www.sport5.co.il/ بتراجعوا على يوتيوب كل اللعب من آخر 10 مونديالات وبتخلعوا رب ويكيبيديا عشان تحفظوا معلومات.. كل هاد عشان توكونوا IN... وزلام.. ما تحلّوا عن طيزي.
أنا بحضر المونديال وبحب المونديال.. وبعرفش مين مدرب إيطاليا الي بده يجي ولا بعرف مين مدرب إيطاليا اليوم.. بعرف مرادونا وميسي وكاكا.. هاد الماكسيموم.. بعرف خفيف وبشوف مين بلعب حلو ومين بلعبش حلو.. وبحب وبنبسط وبزعل وبكيّف وممكن ابكي (اذا فريق بكرهه بغلب البرازيل). بعرض إمياتكوا خلص.. الفلم هاد تبع إنك تقعد تزت أسامي وتاريخ وبعرفش شو.. إنحرق.. وبالآخر ع شو؟ انو احنا منعرف .. واحنا فاهمين.. واحنا مش عارف شو... وحياة ربكوا.. شو فاهمين؟ شو ممكن تفهموا بإنوا سلوفاكيا طيّرت إيطاليا؟

3. بلعبة الارجنتين والمكسيك اوّل مرة بشوف فوفوزيلا عنجد .. وبسمع صوتها جنبي... يمكن لازم أتراجع عن شو كتبت عموضوع أوروبا وأفريقيا والإستعمار...

4. أجتك الفوفوزيلا يا تارك الصلاة...

5. والله يا مكسيك خسارتك زعلتني.. والله يا مكسيك تحرم عليّ الكورونا والتاباسكو والدوريتوس مكسيكاني للمونديال الجاي..

6. أنا بكره الأرجنتين، بهضمهنش.. بس قد ميكون.. أكيد معهن ضد ألمانيا.. وبعدين الباراجواي بتطيّركوا :)

اليوم السادس عشر

1.تخيّلوا مونديال للأحزاب العربية...

الجبهة تفوز بـ4 أهداف غير قانونية سُجلت إما باليد وإما من نقطة تسلل، سجلها لهم الحكم بشكل خاطئ..

التجمع يتراجع بثلاث نقاط بعد أن تلقى الكابتن بطاقة حمراء وأخرج قسرًا.

الحركة الإسلامية الشق الجنوبي، وبتصريح خاص من الـ"فيفا"، تجري 10 تبديلات للاعبين خلال مباراة واحدة.

الحركة الإسلامية الشق الشمالي لا تشارك في المباريات إنما فقط تستضيف البطولة وتحجز 69% المقاعد في الملعب لجمهورها وذلك تماشيًا مع ما اعتادوا عليه في مهرجانات "الأقصى في خطر".

أبناء البلد يقاطعون المشاركة في البطولة بسبب مشاركتهم في دوري كرة السلّة الثوري، إلا أنهم لا يستبعدون مشاركتهم في البطولة القادمة في حال وصل عددهم إلى ما يزيد عن 11.

وأحمد طيبي.. يلعب بالجميع.

2.غانا الهوى غانا... ورمينا الأمريكانَ.

3. اليوم بس إكتشفت صديقتنا إنه الإشي الأسود الي بسحبه الحكم من جيبته وبسحب منه البطاقات هو إشي خاص بالبطاقات... قال يا سيدي كانت مفكرتها هويته.

4. عندك كل الأسباب تحب التصفيات النهائية بالمونديال... اللعب أجمد... المباريات مصيرية... الحسم ضروري... وأكثر سبب مُقنع: أهوَن تفهمها للصبايا.

5. حكيتلكم أول مبارح كنت بعرس.. والصراحة.. العرس كان كثير جامد.. بس في شغلة واحدة أزعجتني.. المطرب خليل أو نقولا فش بفرقته فوفوزيلا... وبما اننا بفترة اعراس، لازم لجنة المتابعة تطلع قرار بإدراج الفوفوزيلا ضمن كل فرق الأعراس المحلية... (زُهير فرنسيس فش حاجة... صوته بكفي إزعاج.)

اليوم الخامس عشر

1. مباراة البرازيل البرتغال- يجلس الشاب بين اربع صبايا، يشتم، يزمجر، يغضب، يوزع أوامر على اللاعبين أمام الشاشة الكبيرة وينظر إلى حكم المباراة نظرة عتاب: "حمار". ثم يميل قليلًا عليّ انا الذي أجلس وحيدًا على طاولة جانبية حجزتها 3 ساعات قبل بدء المباراة، أو بالأحرى، لم أجد سببًا لأجلس في المقهى، فاتخذت حجز الأماكن سببا بالرغم من أن المقهى نصفه خالي. يميل ويهمس في أذني: "قُـلي ياخي... رونالدو مش مرّة كان يلعب مع البرازيل؟ شو صار؟"

2. الي صار بلعبة البرازيل كثير طبيعي، لما الإنسان يكون ضامن نجاحه، ما بيحتاج يبذل كثير طاقة وبسمح لنفسه يخبّص أحيانًا.. وبالتالي.. العكس صحيح.. لما يكون عنده مباراة حاسمة وهامة، بيجنّد خيرة اللاعبين، وأفضل اللاعبين وما في مجال للتخبيص... هيك كلشي بالحياة... بالحرب نفس الشيء، على المكان الي المعركة فيه حاسمة وهامة ومشتعلة، بتبعث خيرة الجنود، وع المحلات المضمونة بتبعث أي حدا... قد ميكون زبالة...والأغلاط مغفورة. بكلشي هيك.. بالتجارة.. بالحرب.. بالرياضة.. كلشي.. في بس اشي واحد.. وهو الأحزاب العربية... كل ماشتدت عليهم معركة الإنتخابات أكثر، وصارت حاسمة وصعبة أكثر... بجيبوا وبتحالفوا مع ناس خرا أكثر.. وبخبصوا اكثر.. وانتم أدرى.

3. يوتيوب اليوم ضافوا كبسة.. بتكبس عليها بتصير تضرب صوت فوفوزيلا... بغض النظر لشو عم تحضر.. وكيف وايش ومين.. عن جد إبداع.

4. -"ياخي خلص.. لازم يكون المونديال لحد ربع النهائي.. وبعدين يتقاسموا الكاس كل منتخب سنة..روتاتسيا يعني.. تناوب... هيك بريّحونا..."

- "شكلهن بخافوا يصير في مُنتخب دُرزي... ويقدحلهن بالكاس."

5. ساحل العاج اليوم خرجت من المونديال... على الأقل خرجت بكرامتها وبعد أداء رائع (القسم الي لحقت اشوفه)... ساحل العاج طلعوا من المونديال بكرامتهن... وهاي رسالة مني للمنتخب الإيطالي مثلًا: "إحنا منكرهش حدا، ومش قصدنا نجرح حدا... وعن بعز علينا.. وكلنا أمل.. عنجد.. ان المونديال الجاي.. لما تطلعوا من مرحلة المجموعات كمان دور... تطلعوا بكرامتكم."

6. كريستيانو رونالدو بالظبط زي اليسار الفلسطيني... شايف حاله على الله.. واقف بنص الملعب مش عم بتحرك.. مش مستعد يركض متر.. بستنى الطابة تيجي لعنده.. تصير بملعبة.. ولما تصير الفرصة بين إيديه.. أو إجريه... بضرب ضربة بودّر الطابة بسابع سماء وبسجلش ولا هدف... الفرق الوحيد ان ضربات رونالدو مرات بتكون قوية.

7. مونديال 2010 جنوب أفريقيا- اليوم الخامس عشر- برعاية:

وسام علي الصالح

أمين عاف حزب النخوة والعطاء الديناميكي

(شو؟)

اليوم الرابع عشر...

1. كنت بعرس صديقنا، صديقنا الي بعد فترة كثير طويلة قرر انه يتجوّز، وحدد عرسه من زمان كثير بهذا التاريخ بالذات. وهذا صديقنا، من يوم م خلق، وهو مشجع إيطاليا على العظم.. يعني.. إيطاليا ولا ربّه. وبالصدفة طلعت لعبة ايطاليا بيوم عرسه، وخسر... طلع... وليلة دخلته، صارت ليلة طلعته... كفريق.. مبروك يا صديق... وانشالله كمان اربع سنين، في عيد زواجك الرابع، إيطاليا بتطلع كمان دور :)

2. اليوم قررت أهدافي المعلنة من المونديال:

أولًا، فوز البرازيل بكأس العالم

ثانيًا، وصول غانا الى اعلى مرتبة في البطولة.

ثالثًا، التخلص من الفرق الأوروبية في أسرع وقت، خاصةً الفرق التي تمثل دولًا مشاركة في الـ G8

رابعًا، أباعص بهلواحد.

3. قال لي صديقي: "شو بفهمك بالفطبول.. قال المانيا تطلع قال.. ألمانيا إلها 17 مونديال مطلعتش قبل مرحلة المجموعات.. بتفهمش بالفطبول تحكيش... وهذا الصديق.. بشجع إيطاليا.. وأنا بفهمش،فعلًا بالفطبول... بس بقدر.. بكل سرور.. أشمت :)

4. عن الشاعر محمود درويش... بتصرّف مبالغ فيه:

يا أهل إيطاليا الوداعا !

اليوم أكملت الرسالة
فانشروها, إن أردتم,
في القبائل
توبة ...
أو ذكريات ...
أو شراعا

اليوم أكملت الرسالة
فيكم
ولو تطفئوا لهبي, إذا شئتم,
عن الدنيا
وإن شئتم, فزيدوه اندلاعا

يا أهل ايطاليا الوداعا!

5. زمباروطّا... هذا اسم بقابل فيه وجه ربه ؟

6. المحلل الرياضي، شيء محيّر فعلًا... فجأة، يتفاعل.. يحتد ثم ينفجر لهجمة إيطالية .. يفرح.. يصرخ... يصهل.. واااااو... جوووووووووووول....يلاااااااااا.... وبعد خمس دقائق.. بالظبط... يحتد ثم ينفجر لهجمة سلوفاكية.. يفرح.. يصرخ.. يصهل.. وااااااااو... جوووووووووووووووول... يلااا..... إنو.. شو؟ معقول كل هاي موضوعية؟ انو بدك تقنعني انو هذا كله مهنية صحافية؟ ... مهو يا إنك سوبر موضوعي.. يا إنك كذاب.. وموجهن... ومنافق.. وبتفرح علطرفين... وبالتالي خرا.

7. سونيا اليوم حكت جواهر: كس إختهن... حدا بشجع شعب بينتخب برلوسكوني؟

8. أشرف حكى جواهر أكثر: المونديال الجاي منظمة التحرير ستهدي كأس العالم للمنتخب الإيطالي.

9. إيهاب حمام، مبروك يا صديق.. وإن شاء الله رب العالفين.. بتضلك مبسوط بحياتك دايمًا انت والعائلة الجميلة... ولذلك:

مونديال 2010 جنوب أفريقيا، اليوم الرابع عشر برعاية...

إخوان حمام

راديو الشاطئ سابقًا وتلفزيون ميكس حاليًا

(ومحل البوريكس إلي تحتهن)

عاجل: لا يمكنني الإنتظار!!!

إهداء من المنتخب الإيطالي إلى جميع مشجعين إيطاليا:

ودّع هواك... وإنساه وإنساني

عمر إلي كان.. مهيرجع تاني

كان حلم وراح... إنساه وارتاح

ودّع هواك.. ودّع.

اليوم الثالث عشر...

يوم حداد رسمي...

اليوم الثاني عشر

1. من أكثر الفرق الي كنت أكرههن هو الفريق الفرنسي، وهذا يعود إلى انهم غلبونا (البرازيل) في مونديال الـ 1998... ومن يومها وانا بطيقهنش.. كره العمى يعني.. بس الصراحة؟ اليوم عن جد شفقت عليهن.. إنهيار كامل... مدرب شكله حزين... عن جد حرام.
2. إنه كنت أفكر اليوم... ريموند دومينيك مدرب المنتخب الفرنسي، ماله ومال الفطبول؟ انو هذا شكله شكل واحد بعلّم فلسفة بالسوربون.. بأفضل الأحوال... مش مدرب فطبول أكيد... ويا للهول... شو تذكرت.. عن جد إشي صاعق... المدرب الفرنسي يهودي!!! ومش بس يهودي... بل عميد كلية العلوم الإجتماعية في الجامعة العبرية في القدس... ومش بس هيك.. علّمني الفصل الماضي!!!
تفضلوا:
هذا المدرب الفرنسي:

Raymond Domenech

وهاد البروفيسور والمحاضر بالعلوم السياسية بجامعة القدس العبرية:

Avner DeShalit

الله يستر!!

3. حضرت مباراة الأرجنتين اليوم مع آرام، وإليكم تعليقاته:

أ. "شو بدكوا باللعبة؟ بيرة وإيش؟ لازم بيرة وكمان إشي... بيرة ومُملحات.. وين المُملحات؟ أكلتوا المُملحات؟ البيرة منحطها بالبراد بس المملحات ما منحطها بالبراد...ما بنفع نشاهد المباراة بدون بيرة ومملحات" يلعن الله... إذا إبن 4 سنين وفهم هاي الحقيقة!

ب. "مجد انت مع البرازيل؟ يعني انت مش مع مصر؟ طيب ليش؟ مهي مصر بطابا..احنا منحب نروح ع طابا."

ت. "ليش هيك مارادونا لما يجي هدف بصير ينط زي البطريق الأهبل؟"

4. تبرير رامة لإنه ميسي مش عم بجيب أهداف: " المونديال بأوله...ميسي بعده مستحي..."

5. مونديال 2010 جنوب افريقيا- اليوم الثاني عشر- برعاية:

الخااااااال

اليوم الحادي عشر

7. رقم الملاحظة مقابل لا شيء... يمكن، أو أكيد، لأني كنت مع كوريا الشمالية. ولكن... الحلو بكل الموضوع هو ان كريستيانو رونالدو سجّل هدف من 7 وانبعص.

2. يعلم الله إن كانت الرقابة في كوريا الشمالية حذفت مشاهد من اللعبة... وروح إقنع الشعب الكوري اليوم إنهن خسروا 7-0 مش 2-0.

3. في نسبة غباء أخت شلن عند الجمهور بكاس العالم... إنتبهوا... بتيجي الكاميرا على الجمهور... بقوموا الجمهور بيشوفوا حالهم على الشاشة الكبيرة بالملعب.. وبنعجقوا.. وبيصيروا يشوّحوا بإيديهن ويسلّموا وينطوا بإتجاه الشاشة... وببطلوا يبيّنوا

إنو ما حدا عارف يفهمهن انه عشان يبينوا لازم يتطلعوا على الكاميرا... مش على الشاشة؟

4. كنّا نحكي عن الفوفوزيلّا... وعن إنو كيف بدهن يمنعوها وكيف بدهن يفرضوا أجواء أوروبية على مونديال أفريقي... وإلى آخره... وبالتالي فإننا ندين بشدة العقلية الإستعمارية الإمبريالية التي تسعى لان تجعل أفريقيا نسخة عن اوروبا.. وترفض الآخر رفضًا عنجهيًا شوفينيًا... ما يتمثل بتغيير حالة الطقس... والتوسط لدى الله لجعل الطقس في أفريقيًا ماطرًا وشتويًا حتى في عز دين رب الصيف... أموت وأفهم شو دينها أفريقيا الي فيها درجة الحرارة 10 سيلزيوس بطقة الظهر.. أنا وفوزي.. سهرانين..شووو...انا وفوزي بطقة الظهر.. شوووو؟

5. بمناسبة إمتحان "الفلسفة الحديثة أ" الذي اقترب يومه.. ويوم الفرقان ما بين أن أكرم أو أُهان... منتخب هندورس، مرة أخرى، بعد تشافيز و جيفارا.. يهديني اللاعب:

إبن عم الفيلسوف باروخ شبينوزا.. اللاعب روجيه شبينوزا!!

13. Roger ESPINOZA

http://www.fifa.com/worldcup/players/player=304934/index.html

6. وبهذه المناسبة... مناسبة الإمتحانات السعيدة... بإسمي وبإسم جميع "يا طلابنا العرب الأعزاء" نقول:

يا أهلا بالمعارك!!!

أو يا WELCOME بالمعارك!!!

12. Georgie WELCOME

http://www.fifa.com/worldcup/players/player=295931/index.html

اليوم العاشر

أولًا، عذرًا على التأخير

1. كل ما عم تخلص لعبة... بصير المذيع الإسرائيلي يقول: " سنساتسيا"... انو يعني كانت لعبة درامية ومثيرة وبعرفش شو... انو غريب هذا المونديال من وين مستهديين على كلمة "سنساتسيا"... يمكن لأنه دولة مجبورة تخلي الناس بجو أكشن... وبتعرفش تحكي اشي بعيد عن السياسة... فلازم تقول شي قريب على "سانكتسيوت" ... بس وينكو ووين السنساتسيا بلعبة ايطاليا وبين السانكتسيا باللعبة مع إيران.

2. مبارح في لاعب نيوزيلاندي اخذ تحذير من حكم المباراة قال لأنه يا سيدي مثّل إنه انصاب...قال يعني في تزييف.. انه سوري... بس مش ملاحظين انه 90% من الأخطاء الي بتصير بالمباريات كلها تمثيل وتزييف... اجت على هاي؟

3. صدق... أو لا تصدق... للاعب المنتخب الإيطالي "زامبروتا" أخ توأم في العراق... وهو أشهر، عربيًا، من نار على علم:

هاي الرفيق زامبروتا

وهاي الاخ التوأم، الموسيقي العراقي نصير شمّة:

4. نيوزيلاند تمتاز بشيء أساسي وهو طير الـ"كيوي"..الكيوي هو طير لا يعيش في أي مكان في العالم سوى نيوزيلاند... وتقول ويكي بيديا عن هذا الطير: " من الحيوانات التي تعيش في نيوزلندا فقط، لذلك يفتخر الشعب النيوزيلندي بهذا الطائر الذي يعتبر رمزهم القومي، بل ويطلقون على أنفسهم اسم "كيوي" أيضا. ... الكيوي من الطيور التي لا تستطيع الطيران نظرا لقصر جناحيها، ولها أرجل طويلة نسبيا وقوية في نفس الوقت تساعدها على الجري السريع... منقار طائر الكيوي طويل ذو شق على طرفه كالخيشوم مما يساعده على شم رائحه طعامه خلال الظلام حيث أن طائر الكيوي يمتلك عيون صغيرة معتمة لا يستطيع الرؤية بها بوضوح"

إذًا يمكن استنتاج التالي عن مباراة المنتخب النيوزيلاندي ضد ايطاليا:

المنتخب النيوزيلاندي هو منتخب الكيوي..

مزبوط جناحه صغيرة ومش راح يعلي للنهائيات.. بس ارجله مش قليلة بالمرة.. وبما إن عيونه صغيرة فمش شايف المنتخب الإيطالي من متر ... وبالتالي حط منقاره الطويل بمؤخرة إيطاليا.

5. البرازيل هي البرازيل الـ فريق الجامد! .... بس لو سمحتوا... انا موعود بسامبا وصداري والله... شو؟

6. مبارح حضرنا لعبة البرازيل بالدار... أبو المجد عزم الشباب الطيبة من جحافل الحركة الوطنية الباسلة ... وكان موجود معنا شب صديق كان مره بالشبيبة الشيوعية جبناه عشان نضربه في حال خسرنا :)

7. مونديال 2010 جنوب افريقيا-اليوم العاشر- يقدم لكم تحت رعاية:

أبو المجد.

اليوم التاسع

1. "إييييي طَلَّع ! شفت؟ هدف ذاتي !! ولااو؟" ... وروح إنتي إسا إشرحلها إنه لأ... إنه اذا صابت بإيد حارس المرمى قبل متفوت جول بتنحسبش هدف ذاتي... وإنها تفهم.. أبدًا.

2. بيرة بدفايزير استبدلت الكارلسبيرغ برعاية المونديال... عُقبال الطيّبة.. السبيسيال او ألمازة او السُتيلّا يا بيه.

3. بتشوفوا عمّالين دعاية بالملعب لإشي إسمها Mahindra Satyam وبما انه ولا عرص قابل يقوم دقيقة يدوّر بجوجل.. وكله راخي مؤخرته ومش قابل يتحرك من محله، أنا بعمل الشغل. ماهيندرا ساتيام شركة هندية من أكبر شركات الحوسبة في العالم المتخصصة بتقنيات المعلومات التكنولوجية IT Service... ليش ممكن مشجع كرة قدم إسا يهمّه شركة تقنيات معلومات؟ شو خص؟.. بيرة بفهم.. أديداس بفهم... الطيران الإماراتي(لكل الفتحين: الي بيجي ع المونديال بيجي بطيارة) بفهم... بس تكنولوجي انفورميشن سيرفيس؟؟ ومن الهند؟

4. انا بفكر انه لازم ينعمل مونديال بالهند. (مفضل بالأول تفحصوا الآلات الموسيقية لدى الشعب الهندي أحسن منوكل خرا)

5. بتحسوا إن الإعلان تاع الطيران الإماراتي بعملوا إشي منيح؟ هيك اشي انتماء وكبرياء؟ دشرك انو الشركة مفيهاش ولا اشي عربي غير إسمها.. بس إنو على وضع المنتخب الجزائري.. إعلانات الطيران الإماراتي هي الإشي العربي الوحيد الي ممكن يكمّل لمرحلة ثمن النهائي.

6. أكثر إشي مُحزن بالعالم هو لاعب برتكب خطأ جامد وبياخذ كرت أحمر... عنجد الإشي محزن. انا بعرف حزب كان بتاريخه يوزّع بطاقات حمراء للناس الي برتكبوا خطأ وبفوتوا عليه... وكمان إشي مُحزن.

7. هاي أحلى اغنية إلها علاقة بالمونديال... آسف للزملاء الي ما بفهموا لغة عبرية:

اليوم الثامن

1. كل العُبوس على وجه كل الإسرائيليين في كل العالم، لن يجعلني أحب الفريق الألماني. الفريق الصربي عملّي يومي.

2. حكم مباراة سلوفينيا\أميركا خَلَع كل الـ"وينيرز".. يعني إلي بعبوا وينير.. انه.. 5 بطاقات صفراء بلعبة واحده، شوي كثير.. بس انو انا بدي استغل هذا الموضوع عشان احكي عن الي بعبوا وينير.. شفتوا بحياتكوا حدا بشجّع ان الطابة تطلع لضربة ركنية؟ حدا بشجّع التسلل؟ بحياتكم كنتوا تحضروا مباراة وأجا حدا بنص اللعبة.. وأول سؤال سأله: "أكم كرت أصفر صار في؟"

3.البندل\البلنتي\ركلة الجزاء الترجيحية... أكثر إشي فيه دراما بالعالم... أولًا لأنه عشان يصير ركلة جزاء ترجيحية مجبور قبلها يكون في هجمة للفريق.. وهاي بحد ذاتها دراما... ويصير فاول ودراما بين اللعيبة انو كان ولا مكنش فاول.. وضغط حارس المرمى والحظ واللحظة والعجقة... بس أهم إشي بكل الموضوع.. ان الهدف الي من ضربة جزاء ترجيحية أقل هيبة من هدف عادي.. وبس بضربة الجزاء الترجيحية (ولا أي لحظة ثانية) الدراما الأكبر بتكون لما حارس المرمى يمسك الطابة، مش بالعكس .

4. إسبانيا، المانيا، انجلترا وبريطانيا.. تعليقي على فشلكم المتتالي: ينعاد عليكوا بالصحة والعافية.


5. ليش حارس مرمى الجزائر زلمة وجامد؟

لأنه حمامته واقفة!

6. اليوم فهمت شو علاقة الحمامة باللُعُب.

7. من وحي فكرة وسيم خير عن حمامة المنتخب الجزائري: كان ناقص يعشش عنكبوت بزاوية الجول.. منعلن حارس مرمى الجزائر نَبي.

8. في كم صاحب بحبوش يقعدوا بإليكا لأسباب سياسية... بتفهّمن... مع ان المحل كثير جامد.. وكثير جوّه بالراس، وبما حضرنا اللعب مبارح واليوم هناك:

مونديال جنوب افريقيا 2010- اليوم الثامن- يقدم لكم تحت رعاية:

مقهى "إليكا" للسلام والمساواة

اليوم السابع

مش فاضي ... حيفا أهم منكم :)

*ملاحظة: كس أخت فرنسا.

اليوم السادس

1.مونديالي يصل إلى حيفا، انا أصل إلى حيفا. هناك في القدس نبحث عن مكان لا نشعر فيه بغربةٍ تُخجلنا حين نقفز فرحًا لتسجيل هدفٍ لفريق نشجعه، يصبح كل شيء أقبح وأخبث وأقذر. هنا في حيفا... حين تصبح غربتي عن كل شيء، أملًا بعيدًا من الصعب وصوله، في حيفا حيث كل شيء مسجلٌ فيك ولك فيه ذكريات وأبعاد منذ الأزل وإلى الأبد (بما اني عم بدرس للخرا الإمتحانات: راجع الفيلسوف لاينفنيتس).
الآن نُكرر: يمكنك ان تنغمس في عشق نساء كُثُر. لا يمكنك أن تنغمس في عشق أكثر من مدينة، وقد اخترت مدينتي.

2. مباراة هوندوراس وتشيلي:
أنا بحب تشيلي.. بحب سانتياغو، وأغنية سميح شقير "سانتياغو أيا الجرح المعاصر هل ترى تكفي المشاعر".. وبحب فيكتور جارا و أغنيته "تي ريكويردو اماندا"... بس .. بما انه تشيلي غلبت.. واضح انا مع مين كنت.. مع هوندورس.. شو أعمل.. حظ خرا، دايمًا بطلع مع الخسران.
بس عن جد... بدكو تسألوني ليش مع هوندوراس...
كيف ممكن أكون ضد فريق فيه هذول اللاعبين:

رقم (2) في منتخب هوندوراس:

Osman CHAVEZ

يعني أول إسمه عثمان... إشي طقَع.."איסלאמיסת כזה"

وثانيًا...تشافيز!!! آااااخ بس!

اللاعب الثاني (7) في منتخب هوندورس:

Amado GUEVARA

جيفارا...جيفارا!

ومع هيك.. انا عن جد عن جد سعيد بفوز منتخب تشيلي... خاصةً إنه فيه اللاعب:

Gonzalo JARA

على اسم عائلة فيكتور جارا.. المغني الثوري اليساري التشيلي الذي استشهد في مجزرة "ملعب سانتياغو"، على فكرة، مجزرة إلي نفذوها الإنقلابيين عملاء امريكا في ملعب كرة قدم مدينة "سانتياغو". حين طلبوا من فيكتور غارا، سخريةً، الغناء.. غنّى أغنية "تي ريكويردو أماندا".. ثم مات قتلًا تحت أيادي الطغاة... ملعب كرة القدم في سانياغو اليوم يطلق عليه اسم "ملعب فيكتور جارا".

وأخيرًا، لن نقول لمنتخب تشيلي إلا:

(حارس مرمى فريق تشيلي):

Claudio BRAVO

عنجد برافو!

3. إسبانيا سويسرا هاي المباراة إهداء إلى سعيد سويدان: إله الأسئلة، الأفكار الغريبة والفهم المتأخر للنكت. سعيد كمان شهر وشوي طالع على جيش الإحتياط السويسري.. مبروك يا صديق :)

4. أفريقيا خسرت؟ بسيطة... إحنا واللاتينية قرايب.

اليوم الخامس

1. بعد أداء غانا، الكاميرون، نيجيريا وساحل العاج اليوم.. نعلن بشكل رسمي وبكل فخر.. القول الفصل:
الأفريقي فَريقي!

2. دون أن ننتبه تُصبح كلمة "بوبوزيلّا" كلمة السر لأفرَقة شكل العالم خلال شهر المونديال. الجميع الآن يتذمر ويشكو من صوت الـ"بوبوزيلا"؛ ذاك لأنها من الممكن أن تؤدي الى الصمم، وهذا لأن اللاعبين لا يسمعون المدرب، وذاك لأن الفرق لا يمكنها التركيز والراحة في فترة المونديال.

عفوًا، ولكن المطالبة بمنع إستخدام البوبوزيلا إنما هو مثالًا واضحًا وصارخًا لشيء واحد: عنجهية السيّد الأوروبي.
"البوبوزيلا" آلة موسيقية من التراث الأفريقي، عمرها مئات إن لم نقل آلاف السنوات، والنفخ فيها من مظاهر الفرح الأفريقية، وغالبًا ما تستعمل في ألعاب كرة القدم في أفريقيا بشكل إعتيادي.

إذًا ما الذي يريده نُبلاء أوروبا من البلد المُضيف؟ أن يمتنع عن تراثه؟ أن ينشد أناشيد "كرة القدم والجعة" الإنجليزية؟ لقد قررت "فيفا" أن تنظم المونديال في جنوب أفريقيا، وعليها أن تقبل بأجواء هذا الشعب، تاريخه، نمط حياته، عاداته وكل شيءٍ فيه دون محاولات تغييره وتحويله إلى أوروبا أخرى..آن لـ"نبلاء" أوروبا أن يكفوا عن التعالي والعنجهية إتجاه شعوب العالم الثالث... آن لهم أن يكفوا عن محاولات تحويل العالم إلى نسخة عنهم. آن لأوروبا أن تستوعب أن للشعوب الحق بالحياة... الحياة التي تختارها الشعوب لنفسها.

هل يُخرج صوت البوبوزيلا لاعبي المنتخب الانجليزي من تركيزهم؟ وماذا لو كان الصمت القاتل يخرج لاعبي غانا عن حيويتهم؟ هل ينزعج المشجعين الهولنديين من صوت الـ"بوبوزيلا" المدوي؟ وماذا لو كان صمت ضواحي بافاريا يزعج المشجع الجنوب افريقي؟ ألن تزعجهم أصوات الزغاريد؟ ما الذي يزعج أكثر، صوت البوبوزيلا ام صوت عشرات آلاف المُشجعين يهتفون "נא נא נא רובן עטר בן זונה"؟ إنه مرض الهيمنة.. إنه مرض الذين يمنعون لبس الحجاب... كما أنه مرض الذين يمنعون لبس الـ"شورت"... المرض هو ذاته، ولنغض النظر عن الغالب والمغلوب.

لقد آن لأوروبا ان تكف عن شوفينية الغزاة... إنها نفسية المُستَعمِر أيها الأصدقاء.

3. نيوزيلاند وسلوفاكيا... ما أصعب أن تحسم شعورك بين طرفين لا علاقة واضحة لهم بصراعات الشعوب.

4. كريستيانو رونالدو... من الحالات النادرة التي يمكن أن نجد تطابق كامل بين الأفكار المسبقة والحقيقة. يلعن دينه ما أسمجه.

5. هذا بيت "برازيل، ساحل العاج، البرتغال وكوريا الشمالية".. أقل ما يقال فيه إنه "بيت بيوت": كله بده يخلع كله.

6. مونديال جنوب أفريقيا 2010، اليوم الخامس -وبمناسبة امتحان الـ"إتيكا"- يقدم لكم تحت رعاية:

"أرسطو" إخوان م.ض

اليوم الرابع

1. إشي مش طبيعي. كل فريق بشجعه عم بخسر:نيجيريا خسرت، اليونان خسرت، الجزاشئر خسرت الدنمارك والكاميرون..يمكن لازم أصير مع: ألمانيا، إيطاليا، انجلترا، أميركا والأرجنتين..وفريق الكشاف الإسلامي-إم الفحم.


2. خمس أسباب تكون مع الدنمارك وضد هولندا:
أ. اليهود مع هولندا.
ب. كارلسبيرغ بيرة دنماركية.
ت. دانسكا، فودكا دنماركية.
ث. انا بكرَه الحليب، والهولندية بشربوش غير حليب (لا يشمل لمى).
ج. الدنمارك هنّي الوحيدين الي مش عاملين حساب للإسلام.. هني والـ مستقل فكريًا.



3. حدا يشرحلي.. الكولور إلي بلبسوه اللعيبة، بلبسوه بالأساس عشان الواحد يميّز بين الفريقين.. ومين معه ومين عليه. لعبه مثل الكاميرون واليابان مين بحاجة للكولور؟ مَ على كل الأحوال بتقدر تميّزهن حتى لو لابسين كلهن بوكسرات زهرية.


4. الكولور ما حدا بحتاجه بهيك ألعاب.. الكولور بيحتاجوه بألعاب مثل غانا\الكاميرون، كوريا الشمالية\اليابان، بريطانيا\أميركا، ألمانيا النمسا... أو... فرنسا\الجزائر.

5. حضرت لعبة ايطاليا والبرجواي بمساكن الطلبة- ريزنيك مع "يا طلابنا العرب الأعزاء".. مع "طلابنا العرب" اللي منهم من صارله 10 سنين بالجامعة (ومنهم من ينتظر).. اكتشفت انو في طريقة جدًا سهلة تعرف قديش هذا الطالب حمار ومُتحجر سنين بالجامعة... ببساطة بتقدر تسأله إذا حضر المونديال بمساكن الطلبة من قبل.. إذا حضره، معناها أخونا صارله بالجامعة أكثر من 4 سنين.. وبما انه بعده قاعد على الحشيش وعم بحضر اللعبة بين بقية الزملاء...فشكله مش مستعجل.


6. زاويتنا لليوم.. جد الفروق بين :
المدرب الألماني يوخيم لاو..


اللاعب الإسرائيلي إيال بركوفيتش..




7. نأسف لإزعاجكم ولكن هناك ما يحدث في العالم:
"قتل جندي إسرائيلي وإصابة آخرين في عملية فدائية نفذتها كتائب شهداء الأقصى"


مونديال جنوب افريقيا 2010-اليوم الرابع يُقدم لكم تحت رعاية:

كتائب شهداء الأقصى الذراع العسكري لحركة فتح

اليوم الثالث

1. قبل كل إشي: خسرنا. بعترف. الجزائر خسرت، وخسارة مش فادحة، بل فاضحة. بس إحنا مع الجزائر. و ع الموت.

2. كان صبابا لو نخسر بريطانيا.. يا سيدي مع اميركا... ولك روح.. مع مصر... بس سلوفينيا؟؟!! ... انو عنجد..مين هدول؟

3. إنو.. هدول سلوفينيا.. فريق لابس أخضر وأصفر، كالتالي:
يعني.. هاي سلوفينيا بلد إلي علمها لونه احمر وأزرق وأبيض... ولا تقول إنو فيها أدغال... يعني كلها ثلج.. مش بحاجة للأخضر.. ولا تقول إسلام... ولا تقول متحالفين مع أحمد الطيبي أو حزب الله.. ولا إشي.. أموووت وأفهم ليش لابسين أخضر وأصفر!!!؟

4.تخيلتوا حالكوا مرة بقلب ملعب كرة قدم محترف، خاصةُ مثل المونديال؟ انو على ارض الملعب؟.. تخيلوا:

22 لاعب.. كل واحد اكبر من الثاني.. عضلات.. أجسام.. سُرعة مخيفة.. كل واحد إجره بحجم جسمك... ولابس فوق كل هذا، بإجره، نعل (يعني بووت) إلي فيه 9 مسامير اكبر من أي رصاصة ممكن تنطخ من طول كرم على جيب جيش. وضربات كرة.. بقوة رهيبة الي ممكن تِلوِح الله...عنجد..متخيلين حالكم بهيك ملعب؟ الطابات بقوة الرصاص؟ والإجرين بتقتل الله؟... عن جد الإشي مُرعب... عنجد بخوّف.. بديش أكون بين هيك ناس!

5. غانا معانا.

6.النص الأول من لعبة غانا: كنت شايف إعلان لإشي إسمه " ستودنت سنتر".. كنت افتش وين احضر اللعبة ورحت اشوف هذا المحل.. رنيت على جرس.. فتت.. وما بلاقي حالي.. إلا انا بين 15 يهودي متدين.. حاريدي يعني.. وأنا بالنص... انا إنسان إلي من نص سنة عم بدور على مغامرة.. هاي كانت مغامرتي.. وعن هذا الموضوع.. رح احكيلكم بعدين.. مُطولًا

5. قليلة الأشياء بحياتي الي بتجبرني أحب.. او أكره.. وأنا بطبعي بكره الألمان... بس أنجح الأشياء الي بتخليني أحب الألمان.. هو اليهود.. عنجد..ليش بتحوجوني؟

6. المشترك بين منتخب غانا وتاريخ شعبنا؟! ... اللون الأسود!

7. بعيدًا عن المونديال.. نعتذر لإزعاجكم، ولكن.. هناك ما يحدث في العالم:

محمود احمدي نجاد ردًا على العقوبات الدولي ضد إيران: "عندما يُهاجم أسطول مساعدات بشرية في مياه دولية مجلس الامن لا يرد، وفي الوقت ذاته يصادقون على العقوبات ضدنا... إنها نهاية مجلس الأمن، فإن هذا المجلس قد فقد مصداقيته."

(موقع واي نت.)

8. بما إني حكيتلكم عن اليهود المتدينين الي حضرت معهم اللعبة فـ:
مونديال 2010 جنوب افريقيا- اليوم الثالث، يقدم لكم تحت رعاية:

בד"ץ

المحكمة اليهودية العادلة*

*المحكمة اليهودية العادلة "باداتس": محكمة الشريعة اليهودية الخاضعة للتاناخ والتوراة وصاحبة الحسم في قضايا الشريعة اليهودية .

اليوم الأول والثاني

1. كنت حابب اليونان يغلبوا، بس لعبوا خرا. بتصوّر لو لعب الحزب الشيوعي اليوناني، أو الانارخيستيم، كان الوضع بكثير احسن.

2. أعزائي الأرجنتينيين... إذا نيجيريا وهيك... شو بدها تساوي فيكو البرازيل؟

3. أميركا وإنجلترا... إنو.. شو دخلنا إحنا؟ بروتستانت ببعضهن.. يكسروا روسهن.

4. حضرت كمان لعبة إنجلترا وأميركا وبدي أقول وبالنسبة للاعب "واين روني" الي قرقعونا فيه... فعلًا... وَين روني؟

5. البوبوزيلا.. إشي كثير جامد، بالرغم من الإزعاج. بس إنو شو الله خبطها براسهن؟ إلي مش عارف ع شو عم بحكي، فعم بحكي على هاي الآلة النفخية الي كل جنوب افريقيا عم تضرب عليها بالمدرجات.

6. البوبوزيلا هاي.. إشي كثير كثير مزعج.. عن جد.. بتذكرني بخطابات احمد طيبي.

7. إذا صاحبِك بردش على تلفوناتك كل النهار عشان اللُعب.. يمكن لازم تستنتجي إنو ترخي.. أو تغنّي: "يا خوفي إبقى حبّك...للمونديال إلي جاييِ"

8. ردًا على تساؤلات الشباب العرب المتكررة: لا، العادة الشهرية لدى الإناث لا تُلغى خلال المونديال.

9. إم المجد اليوم بعثت ع القدس ورق دوالي، ملوخية، كوسى، جاج، خبز وبيريه، وبالتالي:

اليوم الثاني من مونديال جنوب أفريقيا 2010 تحت رعاية:

إم المجد.

اليوم الأول

1. ذَكَّرَتني اليوم، كأني ناسي، بهاد الشعور الخرا..هذا الوجع الي بعلق تحت القفص الصدري.. هاي الغصّة.. هاي الدمعة المحبوسة.. . كل مرة بيوقفوا شي جماعة على موسيقى نشيدهن الوطني بالمونديال. هذا الشعور الخرا.. هذا الوجع الي بعلق تحت القفص الصدري.. هاي الغصة.. هاي الدمعة الي بتنفجر، لما بخلص النشيد، بتزقف العالم، وبركض كل لاعب على موقعه. ومنركض احنا كل واحد على تبريراته المُبدعة لتشجيع ناس ما بشجعوه.

2. المونديال بلا بيرة زي أبو مازن... خرا.

3. صحيح الإمتحانات المتزامنة مع المونديال مهمة، كثير. بس للمونديال فش موعد ب.

4. المنتخب الفرنسي... خلص تعطوني أسباب أكرهكم.

5."العزيزة إسرائيل، منذ اللحظة: نمهلك شهرًا كاملًا لفعل ما تريدين دون أن نلتفت إليك. (أي دون أن نعلن إستنكارنا على الأكثر.)"
التوقيع: الرأي العام العالمي.